Цифрлық ашықтық пен қауіпсіздік: облыс мектептері жаңа тамақтандыру және бақылау жүйесіне көшті

Қазақстан Республикасы Президентінің «Әділетті Қазақстан – баршаға және әр адамға. Қазір және әрдайым» сайлауалды бағдарламасын іске асыру жөніндегі Іс-қимыл жоспарының 82-тармағы аясында облыстағы 121 мектептің аппараттық-бағдарламалық кешендер орнатылды («Alaqan Mektep» – 111 мектепте, «ITB» – 2 мектепте, «E-Ashana» – 8 мектепте).

Бұл жұмыстың мақсаты – білім беру үдерістерінің қауіпсіздік деңгейін, ашықтығын және цифрландырылуын арттыру.

Орнатылған барлық аппараттық-бағдарламалық кешендер «Әлеуметтік әмиян» ақпараттық жүйесімен интеграцияланған. Аталған жүйе жалпы білім беретін мектептердегі кейбір санаттағы білім алушылар мен тәрбиеленушілерге тегін және жеңілдетілген тамақтандыруды қамтамасыз ету бойынша мемлекеттік қызметті көрсетудің пилоттық жобасын іске асырады.

Оқушы саны аз және шағын жинақты мектептерде ыстық тамақпен қамту сервисін ұйымдастыру үшін «Бизнес-әмиян» аталатын тегін жүйе енгізілді.

«Әлеуметтік әмиян» жобасы электрондық үкіметтің eGov мобильді қосымшасына интеграцияланған және мектептерде тегін әрі жеңілдетілген тамақтандыру қызметтерін алуға мүмкіндік береді.

Тегін ыстық тамақпен қамтамасыз ету шеңберінде осы қолдау түріне құқығы бар азаматтарға 1414 нөмірінен қызметті алуға мүмкіндік туралы тегін SMS-хабарлама жіберіледі. Келісім болған жағдайда 2*1 растау кодымен жауап SMS жіберу қажет.

eGov Mobile қосымшасында сәйкестендіруден өткеннен кейін ата-ана «Әлеуметтік әмиян» бөліміне өтіп, «Тегін ыстық тамақ» қойындысын таңдайды. Бұл жерде тамақтануға құқығы бар әр балаға арналған ваучерлер көрсетіледі. Қызметті белсендіру үшін «Ваучерді белсендіру» батырмасын басу керек.

Шағын жинақты мектептерде тамақ алу үдерісі «Бизнес-әмиян» жүйесі арқылы жүзеге асырылады — ваучерді есептен шығару үшін асхана қызметкері оқушының QR-кодын сканерлейді.

Бала тегін ыстық тамақ алған кезде бұл ақпарат «Әлеуметтік әмиян» жүйесіне түседі. Ата-ана push-хабарлама алады, сондай-ақ ваучерді басу арқылы баланың тамақтану тарихын көре алады.

Бұл жүйені енгізу жеңілдетілген тамақтандыруды ұсыну үдерісіне толық бақылау орнатады, әр білім алушының тамақты нақты алуын қадағалауға, бюджет қаражатының мақсатты әрі тиімді жұмсалуын бақылауға, сондай-ақ бүкіл үдерістің ашықтығы мен есептілігін айтарлықтай арттыруға мүмкіндік береді.